Din Epost-adresse:

18. juni. Da er skulen over for dette året.

Vi vil ønskje alle elevane våre ein god sommarferie. Vi håpar alle kjem attende friske og raske til hausten. Lykke til på Klones de som skal dit, og velkommen til 1. klasse de som byrjar der. I mellomtida får vi håpe på varme og gode dagar.

17.juni. Årets siste skuletime gjekk med til å sjøsetja vikingskipet vårt.

Med skjold langs sida og dragehovud i baugen, blei det skumle vikingskipet vårt sjøsett med kraftige padletak. Sjølv om vi kunne sjå skumle ut på avstand, var det ein snill gjeng som avrunda skuleåret i Sjårdalen.

15. juni. Etter teltovernattinga var det fint å ta ein tur i skogen.

Det er mykje liv i skogen no. Vi blei vitne til ein flokk med skjorungar som skulle flyge ut av reiret sitt for fyrste gong. Vi fekk også sjå ein ekornunge hoppe frå grein til grein. Høgt på himmelen såg vi svale, og dei veit vi at oppheld seg i Afrika om vinteren. Den er altså ein trekkfugl. Vi fekk også sett eit tre som stod oppå ein stor stein. Da kunne vi tydeleg sjå røtene. Dette var ein spennande dag i skogen.

14.-15. juni. Med humøret på topp kom vi måndag attende på skulen på kveldstid.

Vi slo raskt opp alle telta og gjorde leiren klar for overnatting. Etter arbeidet gjekk vi inn. Der hadde Eldbjørg ordna med pizza til alle saman, og vi kosa oss vel og lenge. Deretter åt vi is, før vi gjekk ut og leika oss. Klokka halv elleve var alle på plass i telta sine, og etterkvart senka roen seg i leiren. Svanhild sat ute og såg til at alle hadde det bra natta igjennom. I 3-tida måtte vi stenge inne hanen, for han var i ferd med å vekkje heile leiren. Ellers gjekk overnatting bra.

11. juni. Store og små pakka sekken og gjekk på bussen til Nordherad.

Med mottoet "ut på tur, aldri sur" blei skuleveka avslutta med tur til Grevrusten i Nordherad. Der var det ei bjørk som hadde slått rot i ein bergsprikk. Det var merkeleg.

10. juni. Eit uhyre av eit vikingskip stod klart.

Vi har lært at eit vikingskip var forma som ein drage, og at det skulle sjå ut som eit uhyre på sjøen. Slik håpa dei på å kunne skremme bort sjømonster og fiendar på sjøen. I dag skulle vi transportere eit vikingskip på land. Med rullande stokkar beskytta vi skipet mot steinar på bakken. Saman arbeidde vi hardt for å flytta stokkane framom skipet medan det vart slept bortover. Ei hard økt i varmt vèr.

10. juni. Med spegel drog halve skuleflokken ned til fuglekassane våre ved bekken.

Der fann dei ut at det hadde blitt liv. Medan nokre kasser var tomme, var det andre stader kasser med egg og ei rugande mor. Vi kunne til og med sjå at nokre var ferdige med ei vellukka klekking.

Tysdag var Sjårdalen tusen år attende i tid.

Med hjelmar, skjold og sverd gjekk ei gruppe med unge vikingar berserk ute i skogen. Med sikre steg lista dei seg innover skogen. Brått storma dei fram og angreip akkurat slik det foregjekk i vikingtida. Mellom slaga lærde vi om kva namn vikingane kunne ha.

Med politiet på besøk har vi no hatt teknisk kontroll av syklane våre. Vi har også sykla hinderløype. Sikkerheita var i fokus når vi gjorde oss ordentleg klare for ein trygg sommar på sykkelen.

Det nærmar seg sommarferie. Her er nokre forslag til kva du kan gjere dersom vèret blir dårleg.

Om du er lei ferien, eller berre vil halde vedlike det du har lært. På internett er det oppgåver om det meste vi arbeider med. Det ligg linkar til mange gode nettstader frå heimesida vår. Klikk på "Skulen" og vidare på det faget du ønskjer å arbeide med. Det siste nye der er Abakus (matte), Zeppelin (norsk), Words (engelsk) og Cumulus (naturfag/samfunnsfag). Du kan også koma dit ved å klikke på dei i denne artikkelen.

1. og 2. klasse har samla egg i lengre tid, og no har dei laga mat av dei.

I kjøleskapet var det ei lang rekkje med egg frå vår eigen hønsefarm. Sidan hønene våre er dvergar, blir ikkje egga så store som vanlege egg. Det har ingenting å si. Smaken er like god, ja faktisk "eggstremt" god, var vi einige om. Tomatsuppe med kokte egg var ei super overrasking i kvardagen.

I strålande sol tok vi torsdag turen til Jutulheimen.

Alle skuleungane var med då vi tok bussen nedover til moom. Vi gjekk av bussen ved kyrkja, og gjekk sjølve opp til Jutulheimen. På turen fekk vi sett jutulporten på nært hald. Etter ei matpause i Jutulheimen, kom Trond Ole Haug. Han var med oss rundt i dei forskjellige husa. Han lærte oss om lusskap, klebersteinspeis, Jo Gjende og mykje anna. Vi fekk innblikk i livet for 1000 år sidan, og 100 år sidan. Her ser vi Jo Gjende, og på biletet nedanfor ser vi børsa hans. Det er nummer to frå høgre.

Fjell blir "bært" og lauvet sprett.

Dei raude dagane var fint plassert i år. Tysdag var siste skuledag før vi tok fatt på seks fridagar etter kvarandre. Mykje av tysdagen gjekk med til å rydde og pynte på skuleområdet. Været var så fint at vi kunne eta maten vår ute. Programmet 17. mai er heilt klart, og vi gledar oss. 

I desse dagar bruker vi mykje tid på å øve på songane til 17. mai.

Vi gledar oss til 17. mai. No øver vi dagleg på songane vi skal framføre. Barnehagen og skulen skal synge mange songar i lag, og da trengs det trening. Vi ligg godt an, og vi lovar å vera heilt klare når den store dagen kjem.

Leselystaksjonen er ferdig.

Etter intense veker med leselystaksjon, har vi avslutta prosjektet og målt bokormen. Den blei 13 meter lang, og ålar seg over garderobeplassane og tvers over taket. Heldigvis er det ikkje ein levande orm.

Trur du at du klarar å knuse eit egg inne i handa di? Det har vi prøvd.

Det var vanskelegare enn vi trudde det. Vi la eit rått egg i ein plastpose, og så la vi det i handa vår. Så klemte vi til alt vi klarte. Men det var ingen som klarte å knuse det. Ikkje før vi slo det mot golvet. Prøv du også.

I to veker har elevane våre vore med på ei nasjonal konkurranse med hoppetau.

No skal vi summere antal poeng og sende resultata til Nasjonalforeninga for folkehelsa. Det er dei som ville ha oss med på denne konkurransa. Målet deira er å få oss til å vera meir aktive, fordi det er bra for kroppen vår. Det var stor entusiasme, og mange har tatt konkurransa svært seriøst.

Eit skjorepar har bestemt seg for å byggje reiret sitt i ei bjørk, berre ti meter frå oppvekstsenteret.

Dei har vore observert fleire dagar på rad. No legg dei på plass kvist etter kvist, og ser nok for seg ein flott sommar med fugleungar like ved ungane på skulen og i barnehagen. Men arbeidet tek tid, og dei må stå på. Det kan ikkje gå for lang tid før dei legg egg. Når hausten kjem, bør ungane vera så store at dei klarar seg sjølve. Vi ønskjer dei lykke til vidare med arbeidet. Du kan lære meir om norske fuglar ved å klikke her.

Vi har vore på besøk på Vågå bibliotek.

I samanheng med leselystaksjonen vår besøkte vi denne veka biblioteket i sentrum. Nokre var kjent med biblioteket frå før, og hadde med lånekort og bøker til innlevering. Andre fekk denne dagen sitt fyrste møte med biblioteket. Da var det ekstra spennande å få sitt eige lånekort. No veit vi at opningstidene til biblioteket er tysdag (1200-1900), onsdag (1200-1900) og laurdag (1100-1400). Leselystaksjonen fortset på skulen, og bokormen vår blir lengre og lengre for kvar dag.

Eit stort byggjeprosjekt er ferdig, og hønene er på plass.

Ein knallgod innsats på siste del av snikringa gjorde at vi endeleg kunne sleppe hønene fri i hønsegarden vår. Ettersom hønene hadde vore observert i ei kasse inne i kjellaren i løpet av dagen, hadde forventningane tilspissa seg skikkeleg fram mot utslepp klokka 1300. Til eit rungande "Pål sine høner i Sjårdalen utslepte" kunne heile oppvekstsenter nyte synet av fire høner og ein hane innta sin nye heim.

Mykje vatn ved tennisbana gjorde det mogleg for 3. klassingane å padle kano.

Det var ikkje så mange padletaka dei tok før dei måtte snu, men det var nok til å ha det litt moro. Med knappe 50 centimeters vannstand var det ein trygg plass å prøve kano for fyrste gong.

Våre seks 4. klassingar er snart ferdige som elevar ved Sjårdalen oppvekstsenter.

Tysdag fekk vi besøk av 18 av dei 37 elevane som går i 4. klasse ved Vågåmo skule (Klones). Vi tok dei med for å syne dei gapahuken vår. Der åt vi saman, gjekk naturstig og leika i skogen. Det var ein god dag i fint vær, og alle fekk nye bekjente. Alle syntes det var ein triveleg gjeng vi hadde fått besøk av. No ser vi fram til å treffe dei att.

Måndag fekk vi besøk av Liv Marie Austrem.

Ho er opprinneleg sjårdøl, men bur no i Oslo. Liv Marie Austrem tok turen til heimbygda for å lese frå bøkene sine til oss ved oppvekstsenteret. Ho har blant anna skreve Skavanken og Tvillingbror. Det var ei fin stund både for skulen og barnehagen. Ekstra spennande var det å studere dei flotte teikninga i bøkene hennar. Det markerte også starten på årets leselystaksjon for skuleungane. No blir det spennande å sjå kor lang bokormen vår blir når april er omme.

Den fyrste hestehoven er funne.

Fredag blei vårens fyrste bukett med hestehov funne. Det er eit sikkert vårteikn, og ein fin blom å pynte klasserommet med. Kan du finne det neste vårteiknet? Ta med vårteiknet eller bilete av det neste vårteiknet du finn. Det blir lagt ut på denne sida.

Påska er over, og vi gjer oss klare til å ta imot trekkfuglar og andre fuglar for ein hekkande forsommar i Sjårdalen.

12 fuglekasser er snart ferdige og klare for opphenging. Da håpar vi på stor interesse for bustadane våre, og vi ønskjer fuglane lykke til med bygging av reir. Medan du ventar på innflyttarane, kan du klikke deg inn på "Skulen" og vidare på "Natur og samfunnsfag". Der klikkar du på "Fuglekjennskap" for å lære meir om fuglar. Eller berre klikk HER.

Vi har planane klare, og er allereie i gong med bygginga.

Med meterstokkar og sag gjekk vi tysdag laus på alt som var av grove plankar i snikkarkjellaren vår. No skal Sjårdalen Oppvekstsenter byrja med høner. Det var noko startvanskar med kappinga, men innsatsen var upåklageleg. Målet vårt er å ha hønsefarmen innflyttingsklar i veke 15. Du kan førebu deg på hønsedrifta ved å klikke her.

Onsdag hadde skulen påskeverkstad. Vi kosa oss rundt eit langbord der vi pynta egg, laga påskeharer, påskepotter og anna. Ekstra koseleg var det at fire jenter frå 5. klasse kom innom for å besøkje gamle kjente. Kanskje du skal pynte påskeegg heime også? Du finn mange tips viss du klikkar her.

Vågå skal laga Noregs beste skule. Tysdag kveld hadde heile personalet i Sjårdalen møte med prosjektleiar Hanne Blåfjelldal.

Forprosjektet skal foregå i 2010, og seint i haust vil det bli lagt planar for det vidare arbeidet. I desse dagar etablerar prosjektgruppa fire undergrupper. Desse gruppene og heile heile prosjektet kan du lesa meir om viss du trykkjer her.

Vi er attende etter ei veke med vinterferie.

Den fyrste dagen etter vinterferien var den fyrste skuledagen i 2010 der temperaturen var over null. Heile seks varmegradar var det i dag. Da passa det fint å gjera ferdig dei strikka sommarfuglane våre. Dei heng no til utstilling i klasserommet. Det står ein strikka katt ved vindauget. Han passar på at ingen av sommarfuglane flyg ut av klasserommet.

Torsdag gjennomførte oppvekstsenteret sin eigen olympiade. Det var seks greiner å konkurrere i.

Noko kaldt frå morgonen av, men ikkje kaldt nok til å stoppe vårt OL. Opningseremonien starta med presentasjon av utøvarar frå Noreg, Sverige, Finland, Island, Danmark og Tyskland. Langrennsveteran Halfdan Kluften kom heilt frå Hellas med den olympiske eld, og kunne stolt ta av seg skia og opna leikane. Han drog raskt kjensel på dei heimsydde startnummera våre, og kunne fortelja at dei var brukt på skirenn då han var unge. Dagen gjekk så vidare over til hopp, slalåm, aking, skøyteløp, skiskyting og langrenn. Pølsegrillinga flytta vi inn for å få varma oss litt midtvegs i dagen. Til slutt fekk vi twistpremie, før vi tok med skia heim. Alle såg ut til å vera godt fornøgde med dagen. Du kan sjå meir viss du går inn på "Leik og moro" og vidare på "Bilete".

Onsdag hadde vi vår fyrste av fire skule-onsdagar dette året. Skulen og barnehagen samarbeidde da om eit bygg og kunst prosjekt.

Det var bygging av bruer, båtar og gondol inne. Ute i kulda var det iskunst i mange fargar. Ein kald og kreativ dag er over. Her kan du sjå noko av byggverka våre. Gå inn på "Leik og moro" og "Bilete" for å sjå meir.

Her er eit godt eksemplar frå diktinga denne veka.

Det er ljos i ljosløypene kvar kveld.

Frå skulen ser vi ofte skuteren til idrettslaget suse omkring. Dei held løypene opne og fine kvar dag. Omtrent klokka ti sløkkjer ljoset i løypene, og på idrettslaget sine nettsider står det at ein kan vera med på skirenn kvar måndag. Les meir om skirenn og idrettslaget ved å klikke på Sjårdalen IL på venstre side.

Song, skodespel og servering.

I Sjårdalen markerte vi også i år at sola har kome attende. Måndag 8. februar fylte vi huset med familie og vennar. Så song vi om sola, før 1. og 2. klasse "ræppa" for oss. Etterpå spelte vi på tradisjonelt vis skodespel om Reveenka, Askeladden og dei gode hjelparane og Den sjuande far i huset. Til slutt serverte ungane kaffe, saft og biteti.

Måndag 1. februar såg vi sola skine inn i klasserommet vårt att.

Endeleg! Rundt klokka halv ti kunne vi sjå solstrålene skine inn i klasserommet vårt. Det varte ikkje lenge, men for oss var det eit sikkert teikn på at varmare tider er i vente. Vi gler oss.

Det er skulefri fredag 29. januar.

Den dagen kan du bruke på å baka ei kake, lære deg å plystre, laga slalåmbakke, snikre fuglekasse eller besøkje nokon du ikkje har besøkt på lenge.

Stor fart, god stil med knall og fall. Det var mykje liv i skiløyper og hoppbakkar siste time fredag.

Fredag avslutta vi veka med å byggje oss ein hoppbakke. Det gjekk så hardt for seg at hoppet måtte byggjast om. Men sjølv med knall og fall var alle oppe att og satte utfor på nytt. Nokre gjekk etterkvart over til å køyre slalom. Det var ein skikkeleg kosetime før vi tok helg.

Det nærmar seg OL i Vancouver 2010.

Den 12. februar startar dei olympiske leikane i Vancouver. Her kan du sjå dei tre maskottane som vil vera med under heile arrangementet. Dei heiter Miga, Quatchi og Sumi. Viss du klikkar HER kan du lesa og sjå fleire bilete av dei.

Barnemaskerada som skulle vera i Sjårdalen fredag 15. januar er utsatt.

Vi melder på vegne av Sjårdalen kvinnelag frå om at maskeraden er utsatt. Det er på grunn av kulda. Men ikkje gråt. Den er berre utsatt ei veke, til 22. januar.

Det er kaldt om dagen.

 Ungane har vore inne mesteparten av friminutta frå torsdag til måndag. Det kaldaste vi har sett på skulen desse dagane var minus 36 grader. Det var fredag. No håpar vi på temperaturoppgang og skigåing i friminutta.

Det er full fres i rakettane i barnehagen.

Med ønskje om eit godt nyttår har barnehagen laga ei rakettutstilling. Dei smell ikkje, så de må ikkje vera redde for å sjå innom.

Det er berre i songen at jula varer heilt til påske.

Torsdag er jula definitivt over. Da blir englar og nissar lagt tilbake på loft og kjellarrom. No kan vi glede oss over at det var ei fin jul, og at det no går mot ljosare tider.

Det er berre ein dag igjen til skulestart.

Dei vaksne på oppvekstsenteret har hatt ein dag med planlegging. I morgon kjem alle ungane våre tilbake, og vi gler oss til å ta imot dei alle saman. Vel møtt til eit nytt år med nye moglegheiter.

Sjårdalen oppvekstsenter ønskjer alle elevar, barnhageungar og andre i bygda vår ei god jul og eit godt nyttår.

Vi gledar oss til treffe att heile gjengen over nyttår.

Det var ein tradisjonell og god start på juletida sundag.

Messe, Lalm musikkforening, tenning av julegran, nissebesøk og biteti frå Sjårdalen kvinnelag. Det var i grove trekk ingrediensane når Sjårdalen offisielt fekk start på julestemninga sundag. Her ser vi nissane som delte ut godteposar til små og store.

Den som ventar på noko godt ventar aldri forgjeves.

Også på skulen er det nedteljing mot jul. Her har vi felles adventstund kvar dag. Da er både skule- og barnehageungar samla. Utanom det så skal kalendrar opnast også.

Med mange kuldegradar trengst det mange og varme plagg.

I barnehagen har dei god organisering av påkledninga når dei skal ut å leike. Ingen vintersjarme utan kroppsleg varme.

Kom i form til OL 2010.

Sidan det var få som har spelt tennis den siste tida, fekk vi lov til å byggje skøytebane på tennisbana til idrettslaget. Idrettslaget bidrog også med materialar, og med brøytehjelp frå ein snill far kunne byggjinga byrja den 2. desember. No ventar ein velvillig brannmann på det rette været til å sprøyte bana med vatn. Takk for hjelpa til alle som har stått på for oss. Vi gler oss til å utfalde oss skikkeleg.

Ferske rundstykker, smør, rømme og eit stort utvalg oppskore grønnsaker. Det var mykje godt å velja blant.

Tysdag 6/10. Barnehagen inviterte skulen på grønnsakskoldtbord. Vi fekk sitja i familiegrupper, og vi storkosa oss. Det var mange brødskiver som returnerte urørte til heimane denne dagen. Men magane var like gode og mette likevel.